જામનગરમાં કોંગ્રેસ પક્ષ દ્વારા આજે જોરદાર વિરોધ પ્રદર્શન કરવામાં આવ્યું હતું. નેશનલ હેરાલ્ડ કેસના સંબંધમાં સુપ્રીમ કોર્ટ દ્વારા આપવામાં આવેલા ચુકાદા બાદ, કોંગ્રેસના કાર્યકરો રસ્તા પર ઉતરી આવ્યા હતા અને કેન્દ્ર સરકાર સામે ભારે સૂત્રોચ્ચાર કર્યા હતા.
આ વિરોધ પ્રદર્શન દરમિયાન કોંગ્રેસના આગેવાનો અને કાર્યકરોએ ‘ગાંધી લડે થે ગોરો સે, હમ લડેંગે ચોરો સે’ અને ‘ભાજપ હમસે ડરતી હૈ, પોલીસ કો આગે કરતી હૈ’ જેવા નારાઓ લગાવીને વાતાવરણ ગજવી મૂક્યું હતું. કોંગ્રેસનો આક્ષેપ છે કે શાસક પક્ષ દ્વારા વિપક્ષી નેતાઓ, ખાસ કરીને રાહુલ ગાંધી અને સોનિયા ગાંધીને નિશાન બનાવવામાં આવી રહ્યા છે.
જામનગર શહેરના મુખ્ય માર્ગો પર આયોજિત આ કાર્યક્રમમાં મોટી સંખ્યામાં કોંગ્રેસના કાર્યકરો જોડાયા હતા. તેમણે સરકારની નીતિઓ સામે રોષ વ્યક્ત કર્યો હતો અને લોકશાહી બચાવવા માટેની અપીલ કરી હતી. પોલીસ બંદોબસ્ત વચ્ચે આ વિરોધ પ્રદર્શન શાંતિપૂર્ણ રીતે પૂર્ણ થયું હતું, પરંતુ કાર્યકરોનો આક્રોશ સ્પષ્ટ જોવા મળતો હતો.
