દ્વારકાના એકમાત્ર મીરા ગાર્ડનમાં બાળકો માટેના ઝૂલા–સ્લાઇડ સહિતના રમકડાં તૂટેલી અને જોખમી સ્થિતિમાં જોવા મળ્યા. નગર પાલિકા સંચાલિત ગાર્ડનમાં તાત્કાલિક સુધારાની માંગ ઉઠી છે.
દેવભૂમિ દ્વારકામાં બાળકો માટે ઉપલબ્ધ એકમાત્ર મીરા ગાર્ડનની હાલત દિવસપ્રત્યે ખરાબ થતી જોવા મળી રહી છે. શહેરના પરિવારો અને બાળકો માટે એક મહત્વનું રમણિય સ્થળ ગણાતું આ ગાર્ડન આજે બેદરકારીનો ભોગ બની ગયું છે. તૂટેલા ઝૂલા, ઉખડેલ સ્લાઇડ, લોખંડના ખુલ્લા ભાગો અને ખતરનાક રીતે લટકતા સાધનોને કારણે બાળકોની સુરક્ષા જોખમમાં મૂકાઈ છે.
ફોટોગ્રાફર ધનવંત વાયડાએ લીધેલી તસવીરોમાં સ્પષ્ટ જોવા મળે છે કે ગાર્ડનમાં નગર પાલિકાના જાળવણી અભાવને કારણે સાધનો સંપૂર્ણપણે બગડી ગયા છે. સ્થળીય રહેવાસીઓએ જણાવ્યું કે બાળકો માટે રમવા જેવી બીજી કોઈ જગ્યા નથી, તેથી તેમનો એકમાત્ર વિકલ્પ મીરા ગાર્ડન જ છે— અને તેની હાલની દયનીય સ્થિતિ ચિંતાનો વિષય છે.
નગર પાલિકા દ્વારા સંચાલિત આ ગાર્ડનમાં વર્ષોથી જાળવણીના કોઈ પ્રયાસો ન થયા હોવાથી માતા–પિતામાં રોષ ફેલાયો છે. લોકોની માંગ છે કે બાળકોની સુરક્ષા સૌથી મહત્વપૂર્ણ હોવાથી તાત્કાલિક નવા સાધનો મૂકવામાં આવે અને ગાર્ડનનું સંપૂર્ણ રિનોવેશન કરવામાં આવે.
સ્થાનિક નાગરિકોએ સ્પષ્ટ કર્યું છે કે જો પાલિકા તંત્ર આગામી દિવસોમાં પગલાં નહીં ભરે, તો આ મુદ્દે વધુ મોટા પાયે અવાજ ઊઠાવવામાં આવશે. મીરા ગાર્ડન અંગે નગર પાલિકાનો વલણ કેવો રહેશે તે અંગે “યાત્રાધામ દ્વારકા ન્યૂઝ” તરફથી આગામી અહેવાલમાં વિગતવાર પ્રકાશિત કરવામાં આવશે.
